Dalawang State Witness sa Napoles PDAF Cases, Kumontra sa Alegasyon ni Baligod sa umano’y “Selective Prosecution” sa pork barrel scam

Dalawang state witness sa PDAF o “Napoles PDAF” cases ang nagbigay ng bagong sworn statements na kumukuwestiyon sa mga pahayag ni Atty. Levito Baligod hinggil sa umano’y “selective prosecution” sa imbestigasyon ng pork barrel scam. Kinumpirma ng National Bureau of Investigation na natanggap nito ang affidavits mula kina Marina C. Sula at Mary Arlene B. Baltazar, kapwa nasa ilalim ng Witness Protection Program ng DOJ. Sa kanilang sinumpaang salaysay, iginiit ng mga testigo na wala silang nalalamang hindi pagkakaunawaan sa pagitan ng DOJ at NBI kaugnay ng pag-usad ng PDAF cases. Sinabi rin nila na si Baligod ay tinanggal umano bilang counsel nina Benhur Luy at Merlina Suñas. Inilahad din sa mga affidavit ang alegasyon na may kinalaman umano si Baligod sa pagtukoy ng mga mambabatas na isinasama sa mga sumunod na imbestigasyon. Ayon sa NBI, isasailalim sa pagsusuri ang mga bagong sworn statements bilang bahagi ng pormal na proseso ng imbestigasyon.

NEWS