PSA: Produksyon ng Pangisdaan sa Pilipinas Bumagsak ng 15.3% sa Unang Quarter ng 2026

Bumaba ng 15.3 porsyento ang kabuuang produksyon ng pangisdaan sa Pilipinas sa unang quarter ng 2026, ayon sa pinakahuling ulat ng Philippine Statistics Authority o PSA. Batay sa Fisheries Situation Report ng ahensya, tinatayang nasa 856.29 libong metriko tonelada lamang ang kabuuang produksyon mula Enero hanggang Marso 2026, mas mababa kumpara sa 1.01 milyong metriko tonelada na naitala sa kaparehong panahon noong 2025. Ayon sa PSA, malaking pagbaba ang naitala sa aquaculture, marine municipal fisheries, at inland municipal fisheries. Gayunman, tumaas naman ang produksyon sa commercial fisheries sa parehong panahon. Naitala ang pinakamalaking pagbaba sa aquaculture na bumagsak ng 24.5 porsyento o katumbas ng 432.76 libong metriko tonelada mula sa mahigit 573 libong metriko tonelada noong nakaraang taon. Sa kabila nito, nananatili pa rin itong may pinakamalaking ambag sa kabuuang produksyon ng pangisdaan sa bansa na nasa 50.5 porsyento. Samantala, tumaas naman ng 10.4 porsyento ang commercial fisheries production at umabot sa 205.23 libong metriko tonelada. Sa tala ng mga pangunahing species, malaki ang ibinaba ng produksyon ng seaweed, matangbaka, gulyasan, at tamban. Ngunit nakapagtala naman ng pagtaas sa produksyon ng galunggong at tunsoy. Ayon pa sa PSA, patuloy ang kanilang pangangalap ng datos sa pamamagitan ng quarterly fisheries surveys upang masubaybayan ang kalagayan ng sektor ng pangisdaan sa bansa at makatulong sa pagbuo ng mga polisiya para sa food security at kabuhayan ng mga mangingisda.

NEWS